Бишкекте милиция коомдук жайларда, анын ичинде жума намаз учурунда мечиттердин жанында кайырчылыкка каршы рейддерди улантууда. Бул тууралуу борбор калаанын ИИББсынын басма сөз кызматы билдирди.

Милициянын маалыматына караганда, кайыр сурагандардын арасында чет өлкөлүк жарандар да бар. Ошондой эле ИИББ айрым кайырчылар адамдардын боорун оорутуп, акча алуу үчүн өздөрүн майыптыгы бар адам катары көрсөтүшөрүн билдирүүдө.

Милиция дагы бир жагдайга көңүл бурду. Кайыр сурагандардын айрымдары жанына акча которуу үчүн QR-код басылган кагаздарды коюп алышат.

Бирок ИИББнын маалыматына ылайык, мындай QR-коддордун айрымдарын сканерлегенде банктык эсеп башка адамга таандык экени белгилүү болот. Башкача айтканда, экранда кайыр сурап жаткан адамдын эмес, эсептин башка ээсинин аты-жөнү чыгат.

Кайырчылык менен алектенген адамдар менен милиция кызматкерлери түшүндүрүү иштерин жүргүзүп, мыйзам бузуу болгон учурда протокол түзүшөт.

Бишкек ШИИББсы мындай рейддер улантыларын билдирди.