Бүгүн, 27-майда, Бишкек шаарында салттуу маданият жана кол өнөрчүлүк боюнча XX эл аралык «ОЙМО-2026» фестивалы башталды. Иш-чара Чүй проспектиси менен Эркиндик бульварынын кесилишиндеги Курманжан датканын эстелигинин жанындагы аянтта өтүүдө. Фестиваль 31-майга чейин уланат. Бул тууралуу шаар мэриясы жарыялады.

Быйылкы фестивалдын темасы — «Дүйнөлүк маданий мурас: салттар, кол өнөрчүлүк, мурастуулук». Иш-чарага Кыргызстандан, Борбор Азия өлкөлөрүнөн жана башка аймактардан 150дөн ашуун кол өнөрчү, дизайнер жана сүрөтчү катышууда.

Фестивалдын программасына төмөнкүлөр киргизилген:

• кол өнөрчүлөр жарманкеси;
• мода жана кино көрсөтүүлөр;
• шырдак, ала кийиз, курак, токуу, сайма, карапа жана кийиз басуу боюнча мастер-класстар;
• улуттук тамак-аштарды даярдоо боюнча сабактар;
• креативдүү индустрияларды өнүктүрүү боюнча талкуулар;
• Креативдүү индустриялар паркынын жана башка чыгармачыл коомчулуктардын презентациялары.

Фестиваль 31-май күнү эл аралык сынактын жеңүүчүлөрүн сыйлоо аземи жана мода көргөзмөсү менен жыйынтыкталат. Иш-чара салттуу маданиятты сактоо жана креативдүү экономиканы өнүктүрүү максатын көздөйт.