Бишкекте XI кылымда Махмуд Кашгари-Барскани тарабынан түзүлгөн дүйнө картасынын көчүрмөсүн орнотуу пландалууда. Картанын өзгөчөлүгү — автор анда Ысык-Көлдү Жердин борбору катары белгилеген.

Президенттин Администрациясынын басма сөз кызматы билдиргендей, демилгени мамлекеттик катчы Арслан Койчиев сунуштаган. Маданият, маалымат жана жаштар саясаты министрлигине сынак өткөрүп, ишке ашыруу үчүн эң мыкты долбоорду тандоо тапшырылды.

Карта Борбор Азиядагы ислам ренессансы доорунда түзүлүп, маанилүү тарыхый-маданий баалуулукка ээ. Анын көчүрмөсүн орнотуу Махмуд Кашгари-Барсканинин 1000 жылдыгына карата уюштурулуп жаткан иш-чаралардын алкагында ишке ашырылат.