Бишкек шаарында жеке унааларга коомдук транспорт үчүн бөлүнгөн тилкелер менен белгиленген убакта жүрүүгө уруксат берилет. Мындай чечим калаа мэриясынын жолдор боюнча штабынын жыйынында кабыл алынды.

Жаңы эрежеге ылайык, иш күндөрү саат 08:00дөн 20:00гө чейин жеке автоунаалардын аталган тилкелерге кирүүсүнө тыюу салынат. Ал эми саат 20:00дөн эртең мененки 08:00гө чейин, ошондой эле ишемби жана жекшемби күндөрү жеке унаалардын жүрүүсүнө уруксат берилет. Бул тартип жол белгилери орнотулуп, кыймылды уюштуруу схемалары өзгөртүлгөндөн кийин күчүнө кирет.

Мындан тышкары, бөлүнгөн тилкелерде эрежелердин сакталышын көзөмөлдөө үчүн туруктуу рейддер өткөрүлөрү маалымдалды.