И.Ахунбаев атындагы Кыргыз мамлекеттик медициналык академиясында (КММА) Кыргызстандагы биринчи роботтоштурулган хирургиялык система тааныштырылды. Бул тууралуу Саламаттык сактоо министрлигинин басма сөз борборунан билдиришти.

Тааныштыруу иш-чарасына саламаттык сактоо министри Дамир Осмонов, КР Жогорку Кеңешинин депутаттары Дастан Бекешев жана Нилуфар Алимжанова, медицина коомчулугунун өкүлдөрү, саламаттык сактоо тутумунун жетекчилери жана адистери, ошондой эле КММАнын окутуучулары менен кызматкерлери катышты.

Катышуучуларга роботтоштурулган системанын иштөөсү жана анын мүмкүнчүлүктөрү көрсөтүлдү. Саламаттык сактоо министрлигинин жетекчиси хирургиялык консолго отуруп, жабдууну башкарууну өзү сынап көрдү.

Осмоновдун айтымында, «хирург-робот» деген аталышына карабастан, бул система операцияны өз алдынча жасабайт — анын бардык аракеттерин дарыгер башкарат.

«Дарыгер ар бир кыймылды көзөмөлдөйт жана кесүүдөн баштап тигүүгө чейинки керектүү манипуляциялардын баарын аткарат. Ошол эле учурда система өтө так башкарууну жана мыкты көрүнүштү (визуализацияны) камсыздайт», — деди министр.

Роботтун жардамы менен жасалуучу операция учурунда хирург атайын консолдо отуруп, бейтаптын денесине кичинекей кесилиштер аркылуу киргизилген миниатюралык аспаптарды башкарат. Камера операция жасалып жаткан аймактын сүрөтүн 10–15 эсеге чейин чоңойтуп бере алат.

Саламаттык сактоо министрлигинин маалыматына ылайык, бул технология татаал операцияларда, анын ичинде жетүүгө кыйын болгон жерлерде колдонулушу мүмкүн. Ал хирургга аспаптарды тагыраак башкарууга жана айланасындагы органдар менен ткандарды көзөмөлдөөгө мүмкүндүк берет.

«Айрым операцияларда, өзгөчө терең жайгашкан структуралар тууралуу сөз болгондо, дарыгерге керектүү аймакты жакшы көрүү кыйынга турат. Роботтоштурулган система сүрөттү чоңойтууга жана минималдуу кирүү аркылуу кичинекей аспаптар менен иштөөгө мүмкүндүк берет. Бул аз инвазивдик хирургиянын мүмкүнчүлүктөрүн кеңейтет», — деп белгиледи Осмонов.

Ошол эле учурда система өз алдынча чечим кабыл албайт жана дарыгерди алмаштыра албайт. Операция учурундагы бардык чечимдерди хирург кабыл алат.

КММА жакынкы арада академиянын клиникалык базасында роботтун жардамы менен операцияларды жасай баштоону пландаштырууда. 

Мындан тышкары, министрдин айтымында, быйыл Эне жана баланы коргоо улуттук борбору үчүн дагы бир роботтоштурулган хирургиялык система сатылып алынууда.

Тендер аяктады, жабдууларды алып келүү жакынкы күндөрү күтүлүүдө.