2026-жылдын сегиз айында «Балдар үчүн 111 ишеним телефону» кызматына консультация же жардам сурап 5 миң 737 кайрылуу түшкөн. Бул өткөн жылдын ушул мезгилине салыштырмалуу дээрлик үч эсеге көп, анда 1 миң 800 кайрылуу катталган. Бул тууралуу Эмгек, социалдык камсыздоо жана миграция министрлигинин басма сөз кызматы билдирет.

Анын маалыматына караганда, январь — август айларында 111 номерине жалпысынан 49 миң 511 чалуу түшкөн. Алардын ичинен 5 миң 737си консультация же жардам алууга байланыштуу болгон. Кызматка 1 миң 221 бала (21,3%) жана 4 миң 516 чоң адам (78,7%) кайрылган.

4 миң 958 кайрылуу боюнча адистер консультацияларды жана сунуштарды берип, 561 абонентке психологиялык жардам көрсөтүшкөн. Дагы 218 кайрылуу мүнөзүнө жараша Эмгек, социалдык камсыздоо жана миграциянын аймактык башкармалыктарына, ички иштер органдарына жана Өзгөчө кырдаалдар министрлигинин 112 кызматына багытталган.

Кайрылгандардын арасында 3 миң 777 аял (65,8%), 739 эркек (13%), 851 кыз (14,8%) жана 370 эркек бала (6,4%) болгон.

Көбүнчө жарандар социалдык жардам алуу маселелери боюнча кайрылышкан — мындай 3 миң 28 кайрылуу катталып, анын 25и балдардан түшкөн.

Дагы 43 миң 774 чалуу башка мүнөздө болгон. Абоненттер интернетке кошулуу жана уюлдук байланыштын балансын толтуруу маселелери боюнча кайрылып, тез жардамдын, милициянын номерлерин жана башка маалыматтарды сурашкан.

Эң көп кайрылуу Бишкек шаарынан түшкөн — 1 миң 269 (22,1%). Андан кийин Жалал-Абад облусу — 558 (9,7%), Чүй облусу — 544 (9,5%), Ош облусу — 465 (8,1%) жана Ош шаары — 316 (5,5%) турат. Ысык-Көл облусунан 209 (3,6%), Баткенден — 197 (3,4%), Нарындан — 101 (1,8%), Таластан — 93 (1,6%) кайрылуу түшкөн. Дагы 1 миң 985 кайрылуу (34,6%) анонимдүү болгон.

Эмгек министрлигинен эскертишкендей, 111 номерине чалуулар акысыз жана анонимдүү болот. Кызматка шашылыш консультациялык-психологиялык жардамга муктаж болгон учурда, анын ичинде балдарга карата катаал мамиле жана зомбулук фактылары боюнча кайрылууга болот.

Ошондой эле адистер жашы жете электерге психологиялык консультация берип, психологиялык ыңгайсыздык, агрессия, анын ичинде аутоагрессия (өзүнө психологиялык же дене жаракатын келтирүү), ошондой эле суициддик маанайлар болгон учурда жардам көрсөтүшөт.