Бишкек шаарындагы КРдин Улуттук тарых музейинде «Гармония сулуулукту жаратат» аттуу эл аралык көргөзмөнүн ачылышы болду. Экспозиция музейдин 4-кабатында жайгашты.

Келүүчүлөрдүн назарына үч ири музейдин фонддорунан алынган уникалдуу экспонаттар сунушталды. Алардын катарында Кыргызстандын Улуттук тарых музейи, ошондой эле Тяньцзинь музейи жана Ички Монголия музейи (КЭР) бар. Көргөзмө кыргыз жана кытай цивилизацияларынын кылымдар бою өнүгүүсүн чагылдырган искусствонун, кол өнөрчүлүктүн жана философиянын байыркы эстеликтерин бириктирди.

Долбоор эки өлкөнүн музейлеринин ортосундагы кызматташтык тууралуу Меморандумдун алкагында ишке ашырылууда. Анын концепциясынын негизинде салттуу «гармония» — адам менен жаратылыштын, өткөн чак менен келечектин ортосундагы шайкештик идеясы жатат.

Долбоорду Кытайдын Кыргызстандагы атайын жана ыйгарым укуктуу элчиси Лю Цзянпин расмий ачты. Өз сөзүндө ал кытай цивилизациясы дүйнөдө 5 миң жылдан бери үзгүлтүксүз өнүгүп келе жаткан жападан жалгыз маданият экенин эске салды. Элчи бул масштабдуу экспозиция Кытай менен Кыргызстандын ортосундагы маданий байланыштарды жана өз ара түшүнүшүүнү дагы да бекемдей турганын баса белгиледи.