Жусуп Баласагын атындагы Кыргыз улуттук университети социалдык тармактарда дене тарбия сабактары өтүлөт деп тарап жаткан окуу жайдын имараттарынын сүрөттөрү боюнча Reporter.kg басылмасына комментарий берди.

КУУдан билдиришкендей, №8 окуу корпусунда дене тарбия сабактары өтүлбөйт, ал эми тараган сүрөттөр мындан бир жылдай мурда тартылган.

«Социалдык тармактарда жарыяланган сүрөттөрдөгү жайлар бир жылдай мурун тартылган жана алар университеттин башкы имаратынын жер төлөсүндө жайгашкан. Үстүбүздөгү жылдын апрель айынан тарта бул жайлар толугу менен жабылып, пайдаланылбай калган», — деп билдиришти КУУдан.

Университеттин маалыматына ылайык, учурда бул бөлмөлөрдө наркы 1,8 миллион сомдон ашык оңдоо иштери жүрүп жатат. Жумуштарды жакынкы үч жуманын ичинде аяктоо пландалууда.

КУУда дене тарбия сабактары №6 окуу корпусунун атайын жабдылган спорт залдарында өткөрүлөрү баса белгиленди. 2024-жылы ал залдарга капиталдык оңдоо жүргүзүлүп, ага 9 миллион сомдон ашык каражат бөлүнгөн.

«Мындан тышкары, студенттердин дене тарбия жана спорт менен машыгуусу үчүн №6 окуу корпусунун жанында жайгашкан кичи футбол боюнча эки ачык аянтча колдонулат. Ошондой эле башкы корпустун жанында баскетбол аянтчасы бар», — деп айтылат маалыматта.

Жакынкы арада университет волейбол жана баскетбол үчүн атайын жабдылган дагы эки спорт аянтчасын ишке берүүнү пландап жатат.

Башкы корпуста ошондой эле төрт жолку дүйнө чемпиону жана XXII жайкы Олимпиада оюндарынын алтын медалынын ээси Каныбек Осмоналиев атындагы оор атлетика боюнча машыгуу залдары иштейт. 2024-жылы ал жакта наркы 6 миллион сомдон ашык капиталдык оңдоо жүргүзүлгөн. Мындан тышкары, башкы имараттын жер төлөсүндө бокс менен машыгуучу зал жайгашкан.

Университеттен ошондой эле Жибек-Жолу жана Манас көчөлөрүнүн кесилишинде курулуп жаткан жаңы 16 кабаттуу окуу корпусу тууралуу айтып беришти. Анын ачылышы 15-декабрга күтүлүүдө.

«Жаңы корпуста заманбап спорт жана машыгуу залдары, ошондой эле спорттун ар кандай түрлөрү менен машыгууга ылайыкталган аянтчалар жабдылат», — деп маалымдашты КУУдан.

Окуу жайдын маалыматына караганда, бардык окуу корпустарында материалдык-техникалык базаны жакшыртуу боюнча иштер жүрүп жатат. Имараттар университеттин каржылык мүмкүнчүлүктөрүнө жараша этап-этабы менен оңдолууда.

КУУда акыркы 30 жыл аралыгында имараттар дээрлик капиталдык оңдоодон өтпөгөнү, бирок акыркы жылдары университеттин объекттерин калыбына келтирүү жана оңдоо иштери системалуу негизге коюлганы белгиленди.

Анара Мамытова