Быйыл өлкөдө 1 702 бала оор турмуштук кырдаалдан чыгарылды. Бул тууралуу Эмгек, социалдык камсыздоо жана миграция министрлиги билдирди.

Министрликтин маалыматында, мындай көрсөткүч балдардын бакубаттуулугун калыбына келтирүүгө, коопсуздугун камсыз кылууга жана укуктарын коргоого багытталып иштелип чыккан пландарды ишке ашыруунун натыйжасы болду.

Мындан тышкары жыл башынан бери өзгөчө көңүл бурууну талап кылган шарттарда жашаган 3 606 бала аныкталган.

Ошондой эле оор турмуштук кырдаалда турган 1 937 үй-бүлө каттоого алынган. Учурда алардын ичинен 260 үй-бүлө бул абалдан чыгарылганы айтылды. Аларга социалдык жардам көрсөтүлүп, жумушка орношуу, билим алуу жана документтерди калыбына келтирүү боюнча көмөк берилген.