Акыркы он айда өрт кырсыгынан 34 адам каза тапты. Бул тууралуу ӨКМнын Өрттү өчүрүү жана алдын алуу башкармалыгынын башчысынын орун басары Асхат Муканов «Биринчи радиого» берген маегинде билдирди.

Анын айтымында, бул жылы өлкөдө өрт кырсыгы былтыркыга салыштырмалуу көп катталган.

“Бул жылы кургакчылык болду, бул өрт учурларынын көбөйүшүнө алып келди. Жыл башынан бери 2 миң 748 өрт кырсыгы катталды. Бул өткөн жылга салыштырмалуу 38%га көп”,- деп билдирди ал.

Асхат Муканов өрт көп учурда жылытуу мезгилдеринде мешти, жылытуучу шаймандарды туура эмес колдонгондуктан, ошондой эле тамекини өчүрбөй таштап коюудан келип чыгарын билдирди. Ал буга байланыштуу калк арасында дайыма алдын алуу жана түшүндүрүү иштери жүргүзүлүп турарын кошумчалады.