Жогорку сотто өзүнүн IT адистери иштеп чыккан эки санариптик платформа тааныштырылды. Жогорку соттун төрагасы Медербек Сатыевге Судьялар кеңешинин (kenesh.sot.kg) порталындагы «Судьялардын ишмердүүлүгүнүн сапатын кесиптик баалоо» кызматы жана жогорку сот органынын жетекчилигинин жеке кабыл алуусуна жарандарды онлайн каттоо сервиси көрсөтүлдү.

Судьяларды баалоо платформасы жергиликтүү соттордун ар бир судьясынын ишинин жыйынтыктарын эсепке алуунун стандартташтырылган жана ачык-айкын системасын түзүү үчүн иштелип чыккан. Ал субъективдүү мамиле кылуу тобокелдигин азайтып, эсептөөлөрдү жана статистикалык маалыматтарды жалпылоону автоматташтырууга, ошондой эле баалоо жүргүзүлүүчү төрт жылдык мезгил үчүн судьянын бирдиктүү санариптик делосун түзүүгө тийиш.

Баалоо үч компетенция тобу боюнча жүргүзүлөт: кесиптик, жеке жана социалдык. Эң жогорку упай — 100 балл. Объективдүү текшерүүнү камсыздоо үчүн платформа сот актыларын туш келди автоматтык түрдө тандап алууну жана сот отурумдарынын видеожазууларын талдоону карайт.

Экинчи сервис Жогорку соттун жетекчилигинин жеке кабыл алуусуна бекитилген графикке ылайык аралыктан жазылууга мүмкүнчүлүк берет. Арыздарды электрондук түрдө иштеп чыгуу кайрылууларды иретке келтирип, жарандар менен иштөөдө координацияны жакшыртууга тийиш.

Эки платформаны тең Жогорку соттун аппаратынын Маалыматтык технологиялар башкармалыгы сот тутумун санариптештирүү боюнча жумушчу топтун колдоосу менен иштеп чыккан. Судьяларды баалоо процессин жумушчу топ даярдап, аны техникалык жактан соттун IT адистери ишке ашырышкан. Жогорку соттун маалыматына караганда, платформаларды өз күчү менен иштеп чыгуу чыгымдарды оптималдаштырууга, маалыматтык коопсуздукту жогорулатууга жана чечимдерди сот тутумунун муктаждыктарына ылайыкташтырууга мүмкүндүк берген.

Сатыев тааныштырылган сервистерге оң баасын берди. Анын айтымында, сот тутуму заман талабына жооп берип, элге мүмкүн болушунча жакын болуп, сот адилеттигине жеткиликтүүлүктү жогорулатышы керек.