Быйыл Ош шаарында жашылдандыруу максатында 13 жаңы сквер курулууда. Учурда сквер куруунун акыркы этабы жүрүп, көрктөндүрүү жана жашылдандыруу иштери жүрүүдө. Бул тууралуу шаар мэриясы билдирди.

Маалыматка ылайык, скверлерге тротуарлар салынып, жарыктандыруу мамылары, урналар жана отургучтар орнотулуп бүттү. Июнь айынын башында 10 скверди бир убакта ачуу пландалууда.

Аталган скверлердин өзгөчөлүгү болуп, аларга «Жашыл чарба» ишканасы тарабынан тамчылатып жана чачыратып сугаруу системасы орнотулат. Ошондой эле 400 даана гортензия гүлү эгилүүдө. Гүлдөр ишкананын өздүк күнөсканасында өстүрүлгөн.