Кечээ, 2-мартта Жогорку Кеңештин жыйынында депутат Элдар Сулайманов Чоң-Алай районунун Дароот-Коргон айылында Тажикстанга бара турган эл аралык жол бар экенин маалымдады.
Ал ошондой эле аталган жолду кеңейтүү менен 300дөн ашык үй-бүлөнүн тосмолору жана үйү бузулушу мүмкүн экендигин белгиледи.
«Жергиликтүү тургундардын айтымында, алар үйлөрдүн документтерин 1969-жылы эле алышыптыр. Айрымдарынын тосмолору гана бузулса, кээ бирлеринин үйү бузулат. Үч бөлмөнүн бири бузула турган үйлөр бар. Тургундар жолдун кеңейип, бузулушуна каршы эмес, бирок компенсация сурап жатышат, анткени ал жерде элдин жашоо деңгээли төмөн жана эл көчөдө калышы мүмкүн», — деген депутат.
Ал президенттин жана министрлер кабинетинин парламенттеги өкүлү Алмасбек Абытовдон айыл тургундарына компенсация төлөп берүүнү суранды.
Ал эми ЖКнын төрагасы Нурланбек Тургунбек уулу буга этияттык менен мамиле кылыш керектигин билдирди.
“Албетте жолдун жарымын тосуп, чыгып алгандарды бузса болот. Аны эл деле түшүнүп, макул болуп жатышат. Бирок аша чаап кеткен учурлар да катталууда”, – деди ал.
