16-февралда Чоң-Кемин мамлекеттик жаратылыш паркына жакын аймактан уча албай калган ак куу табылды.

Жаратылыш ресурстары министрлигинин маалыматында, ак куу парктан 2 чакырым алыстыктагы Шабдан айылынын айдоо аянтында жүргөн. Жергиликтүү тургундар канаттууну кармап, парктын кызматкерлерине өткөрүп беришкен.

Аталган факт боюнча тиешелүү акт түзүлүп, ак куу «Бугу Эне» жаныбарларды калыбына келтирүү борборуна жеткирилген. Учурда ага адистер тарабынан ветеринардык кароо жүргүзүлүп, реабилитациялык жардам көрсөтүлүп жатканы айтылды.

Министрлик жарандарды жапайы жаныбарларга аяр мамиле кылууга, аларды мыйзамсыз кармабоого жана ушундай жагдайлар катталган учурда тиешелүү кызматтарга ыкчам кабарлоого чакырат.