Чүйдө Бишкек-Кара-Балта унаа жолунун 16-чакырымында үрөй учурган кырсык болуп, эки адам каза тапты. Облустук Жол кыймылынын коопсуздугун камсыздоо башкармалыгынын маалыматында, окуя кечээ, 8-июнда, болгон.

Kia K5 үлгүсүндөгү унаанын айдоочусу рулга ээ боло албай жолдон чыгып, бакты сүзгөн. Катуу соккудан унаа толугу менен талкаланып, чачырап кеткен. Кырсыктан 24 жаштагы айдоочу жана анын ичиндеги 21 жаштагы жүргүнчү тез жардам келгенге чейин эле окуя болгон жерден каза болушкан.

Социалдык тармактарда жол кырсыктын кадрлары жарыяланды. Видеодон катуу соккудан салондогу прибордук панель үзүлүп, спидометрдин жебеси 240 км/саат көрсөткүчүндө катып калганын көрүүгө болот. Учурда кырсыктын жагдайлары такталууда.