22-сентябрда Бишкек шаарындагы «Жаштык Аренада» Кыргызстандын киберкоопсуздук маселелерине арналган «CYBERNOMAD FEST 2026» фестивалы өткөрүлөт. Иш-чараны КР Улуттук коопсуздук мамлекеттик комитети (УКМК) уюштурууда.

Атайын кызматтын маалыматында, фестивалга 700дөн ашык катышуучу, анын ичинде мамлекеттик органдардын, IT-компаниялардын, банктардын, телекоммуникация тармагынын жана эл аралык уюмдардын өкүлдөрү катышат. Иш-чаранын максаты өлкөнүн кибертуруктуулугун чыңдоо жана мамлекет менен бизнестин өз ара кызматташуусун күчөтүү саналат.

Программанын негизги багыттары:

• Cyber Conference: маанилүү инфраструктураны коргоо жана технологиялар боюнча эксперттердин талкуусу;
• Cyber EXPO: киберкоопсуздук жаатындагы чечимдердин көргөзмөсү (30дан ашык компания);
• Cyber Nomad CTF: 50дөн ашык команданын катышуусундагы практикалык кибермашыгуулар жана мелдештер;
• Networking Hub: ишкердик жана кесиптик байланыштарды түзүү аянтчасы.

УКМК өзгөчө көңүл киберполигондогу машыгууларга буруларын билдирди. Анда катышуучулар киберчабуулдарды кайтаруу жана инциденттерди талдоо боюнча практикалык тажрыйба алышат. CTF мелдешинин финалдык этабына эң мыкты 10 команда чыгат.