Бишкекте дем алыш күндөрү муниципалдык унаа токтотуучу жайларда мыйзамсыз иштеген 8 унаа тескөөчүсү аныкталды. Бул тууралуу борбор калаанын Патрулдук милиция кызматынын жетекчилиги билдирди.
Маалыматка ылайык, муниципалдык акы төлөнүүчү унаа токтотуучу жайлардын ишин уюштуруу Бишкек шаардык кеңешинин токтому менен бекитилет. Алар дем алыш жана майрам күндөрүнөн башка күнү иштешет.
«Бирок шаардыктар милицияга кайрылып, дем алыш күндөрү акы төлөнүүчү унаа токтотуучу жайлардын кызматкерлери унаа токтотуучу жайга акча талап кылып жатканын айтышат. Айдоочулар менен унаа токтотуучу жайдын кароолчулары делгендердин ортосундагы чыр-чатактар да бар. Буга жол бербөө үчүн Патрулдук милициянын кызматкерлери тарабынан профилактикалык иш-чаралар жүргүзүлүп, унаа токтотуучу жайлардын жалган кызматкерлери аныкталууда», — деп айтылат маалыматта.
Эгерде сиз ушул сыяктуу кырдаалдарга күбө болсоңуз Патрулдук милиция 102 же 0509102122 телефону аркылуу кабарлоону суранат.
