Жогорку Кеңештин жыйынында депутат Нилуфар Алимжанова көптөгөн улгайган ата-энелер жана туугандары төшөктө жаткан бейтаптарды жана майыптыгы бар балдарды багууну улантып жатышканын, бирок 65 жаштан кийин расмий түрдө жеке ассистент болуу укугунан ажырап калышарын билдирди.

Депутаттын айтымында, курактын өзү эле адамдын жакындарын багуу жөндөмдүүлүгүн аныктабайт.

«Бүгүнкү күндө көптөгөн адамдар 65 жашта да жигердүү жана жоопкерчиликтүү бойдон калууда. Айрым учурларда дал ошол 65 жаштагы эне бүтүндөй үй-бүлөнү багып жатат», — деди ал.

Алимжанова колдонуудагы чектөөлөрдү кайра карап чыгуу өтүнүчү менен ага үй-бүлөлөр кайрылганын белгиледи. Буга байланыштуу депутат мамлекеттик органдарга адамдын ден соолугунун абалын жана багууну ишке ашыруу жөндөмдүүлүгүн эске алуу менен, жеке ассистенттер үчүн курактык босогону жогорулатуу мүмкүнчүлүгүн карап чыгууну сунуштады.

Анын айтымында, мындай чечим майыптыгы бар адамдарды улгайган туугандары багып жаткан үй-бүлөлөр үчүн маанилүү колдоо болмок.