Президент Садыр Жапаров жарлыгы менен Жанарбек Акаев Ош шаарынын мэри болуп дайындалды. Бул тууралуу президенттин басма сөз кызматы билдирди.

Жанарбек Акаев 2025-жылдын декабрында Жогорку Кеңештин VIII чакырылышынын депутаты болуп шайланган эле.

Акаев 39 жашта, ал Ош облусунун Алай районунун Кабылан-Көл айылында төрөлгөн. 2009-жылы Ош мамлекеттик университетинин филология факультетин “Журналистика” адистиги боюнча аяктаган.

• 2007–2013-жылдары “Азаттык” радиосунун Ош облусу боюнча аймактык кабарчысы, Бишкек бюросунун кабарчысы жана Прага шаарындагы борбордук кеңсесинде эмгектенген. “Азаттык+” жана “Ыңгайсыз суроолор” телепрограммаларын алып барган.
• 2015-жылы Кыргыз Республикасынын Президентинин басма сөз катчысы болуп иштеген.
• 2015–2021-жылдар аралыгында Жогорку Кеңештин VI чакырылышынын депутаты болгон.
• 2021-2025-жылдары Жогорку Кеңештин VII чакырылышынын депутаты болгон.

Кечээ, 18-февралда, Оштун мурдагы мэри Жеңишбек Токторбаев кызматтан өз арызынын негизинде кеткени белгилүү болду. Тиешелүү жарлыкка президент кол койду.