Казакстандын президенти Касым-Жомарт Токаев VI Дүйнөлүк көчмөндөр оюндарын жогорку деңгээлде уюштургандыгы үчүн Кыргызстандын президенти Садыр Жапаровго ыраазычылык билдирди. Бул тууралуу ал Эгемендик сарайында өткөн салтанаттуу иш-чарада билдирип, анда казакстандык спортчулар менен машыктыруучуларды Оюндардагы катышуусу менен куттуктады.

Токаевдин айтымында, Казакстандын курама командасы жогорку чеберчилигин көрсөтүп, күйөрмандардын үмүтүн актады.

«Дүйнөнүн 100дөн ашуун өлкөсүнүн спортчулары менен болгон таймаштарда элибиздин татыктуу өкүлдөрү катары Мекенибиздин көк туусун бийик көтөрө алдыңыздар. Улуттук курама командабыз мекендештерибиздин үмүтүн толугу менен актады деп толук ишеним менен айта алам», — деди ал.

Оюндардын жыйынтыгы боюнча казакстандык спортчулар 74 медаль жеңип алып (анын ичинде 32 алтын), жалпы командалык эсепте биринчи орунду ээлешти.

Токаев Дүйнөлүк көчмөндөр оюндары жогорку деңгээлде уюштурулганын белгилеп, анын жыйынтыктарын адилеттүү деп атады.

«Ушуга байланыштуу Кыргыз Республикасынын Президентине ыраазычылык билдиргим келет», — деп билдирди Казакстандын мамлекет башчысы.