9-июнда кыргыз-казак чек арасына жакын жайгашкан «Ак-Жол» фитосанитардык көзөмөл постунда КР Айыл чарба министрлигинин инспекторлору Казакстандан келген жашылчалардын жана козу карындардын ири партиясын мыйзамсыз алып кирүүгө бөгөт коюшту. Казакстан Республикасынан келген жүктү текшерүү учурунда документтерди жол-жоболоштуруу эрежелерин бузуу фактылары аныкталган.

Адистер 4000 кг калемпирдин жана 2736 кг козу карындын фитосанитардык сертификатындагы маалыматтар транспорттук коштомо кагаздардагы маалыматтарга дал келбегенин аныкташкан. Бул дал келбестиктерден улам сертификат жараксыз, ал эми жүктү ташуу мыйзамсыз деп табылган.

Евразия экономикалык биримдигинин (ЕАЭБ) эрежелерине ылайык, продукциянын бардык партиясы Казакстанга жөнөтүүчүгө кайтарылды. Мекеме өлкөнүн азык-түлүк коопсуздугун камсыз кылуу максатында чек аралардагы көзөмөлдү күчөтүү боюнча ишин улантууда.