Дүйнөлүк саламаттык сактоо уюму Конго Демократиялык Республикасында жана Угандада Эбола вирусунун жайылышын эл аралык маанидеги өзгөчө кырдаал деп расмий жарыялады. Бул илдет өлүмгө алып келүү коркунучу жогору болгон өзгөчө кооптуу инфекциялардын катарына кирет. Илдеттин очогу инфекция жуккан адамдын биологиялык суюктуктары менен түз байланышта болгондо жугуучу Bundibugyo штаммындагы вируска байланыштуу.

Учурда Кыргызстанда Эбола илдети менен ооруган учурлар катталган жок, ал эми анын өлкөгө кирип келүү тобокелдиги төмөн деп бааланууда. Ошого карабастан, Саламаттык сактоо министрлиги мамлекеттик чек аралардагы санитардык-карантиндик пункттардын даярдыгын текшерүүгө киришти. Ар кандай биологиялык коркунучтардын алдын алуу үчүн мекеме Атлантика океанындагы круиздик лайнерде жакында эле катталган эпидемиядан кийин хантавируска байланыштуу кырдаалга да мониторинг жүргүзүүнү улантууда.

Саламаттык сактоо министрлиги жарандарга Африка жана Түштүк Америка өлкөлөрүнө сапарга чыгууну пландаштырууда ал жактардагы эпидемиологиялык абалды эске алууну сунуштайт. Чет өлкөлүк сапарлардан кайтып келгенде дене табынын кескин көтөрүлүшү, алсыздык, кусуу же ичтин оорушу сыяктуу симптомдор пайда болсо, токтоосуз түрдө медициналык жардамга кайрылуу зарыл.