Европа Биримдиги Орусияга каршы санкциялардын 21-пакетин бекитип, ага Кыргызстандан үч компанияны жана башка бир катар үчүнчү өлкөлөрдүн уюмдарын киргизди деп билдирет ТАСС.

Мындан тышкары, санкциялык тизмеге Кытайдан 15 компания жана башка беш өлкөдөн 11 компания кирди:
▪ Түркиядан 3 компания;
▪ Казакстандан 2 компания;
▪ БАЭден (Бириккен Араб Эмираттарынан) 2 компания;
▪ Индиядан 1 компания.

Санкциялардын жаңы пакети эмнелерди карайт:

▪ ЕБ үчүнчү өлкөлөрдүн компаниялары тарабынан криптоактивдер менен кызмат көрсөтүүлөргө толук тыюу салуу мүмкүнчүлүгүн киргизет;

▪ жаңы пакет ААОнун (Атайын аскердик операциянын) катышуучуларына визалык тыюу салуу үчүн укуктук негиз түзөт;

▪ ЕБ Кеңеши СПФСти (Финансылык билдирүүлөрдү өткөрүп берүү системасын) колдонууга байланышкан Кыргызстандын бир банкы, ошондой эле үчүнчү өлкөлөрдүн үч банкы менен операцияларды жүргүзүүгө тыюу салды;

▪ ЕБ Орусиянын металлургия жана алтын казып алуу тармагына каршы санкцияларды кеңейтип, эң ири алмаз казып алуучу компаниялардын бирине чектөөлөрдү киргизүүдө;

▪ транзакцияларды жүргүзүүгө тыюу салуу Грузия, Панама, БАЭ, Кыргызстан жана Беларустун криптоактивдер чөйрөсүндөгү 14 платформасына жайылтылат;

▪ Европа Биримдиги санкциялык тизмеге дагы 41 танкерди киргизип, санкцияга кабылган кемелердин жалпы санын 673кө жеткирди;

▪ алыскы аралыкка учуучу учкучсуз аппараттарды (дрондорду) чыгарган орусиялык 37 өндүрүүчүгө каршы санкциялар киргизилди;

▪ Орусиянын аскердик-өнөр жай комплексине байланышы бар 56 жеке жана юридикалык тарапка да чектөөлөр киргизилди;

▪ европалык бизнеске орусиялык эки порт жана төрт аэропорт менен транзакцияларды жүргүзүүгө тыюу салынды;

▪ ЕБ өлкөлөрүнүн компаниялары Орусияга СЖГ-танкерлерин (суюлтулган жаратылыш газын ташуучу кемелерди) сатуу боюнча Европа комиссиясына билдирүүгө милдеттүү. Алдыда Европа Биримдиги мындай келишимдерге чектөө киргизүүнү көздөөдө.