15-июндан тарта Кыргызстанда адал-индустрия чөйрөсүндөгү мыйзам талаптарын бузгандарды административдик жоопкерчиликке тартуу тартиби күчүнө кирет. Бул тууралуу Экономика жана коммерция министрлиги билдирди.

Укук бузуулар жөнүндө кодекстин жаңы 385¹-беренесине ылайык, төмөнкүдөй бузуулар үчүн айып пулдар каралган:

• адал-продукцияларды өндүрүүдө, сактоодо жана ташууда талаптарды сактабоо;
• тастыктоочу документтери жок адал-товарларды жана кызматтарды сунуштоо;
• адал сертификаттарын жасалмалоо же маркировканы бурмалоо.

Айып пулдардын өлчөмү:

• жеке жактар үчүн айып пул – 7 500 сом;
• юридикалык жактар үчүн айып пул – 23 000 сом;
• шайкештикти тастыктоо жол-жоболорун бузган юридикалык жактар үчүн – 65 000 сомго чейин.

Мыйзамга ылайык, адал-продукциялар улуттук бирдиктүү «Адал» белгиси менен маркировкаланышы керек. Мониторинг жана коомдук көзөмөл QR-коддор аркылуу мамлекеттик портал жана мобилдик тиркеме аркылуу жүргүзүлөт.

Министрлик бул чаралар керектөөчүлөрдү адаштырууга жол бербөө жана тармактагы ачык-айкындуулукту жогорулатуу максатында кабыл алынганын билдирди.