Бүгүн, 13-августта, Бишкек шаарында Кыргызстандын Энергетика министрлиги менен кытайлык China Southern Power Grid International кызматташуу боюнча меморандум кабыл алышты. Бул тууралуу министрликтин басма сөз кызматы кабарлады.

Документке КРдин энергетика министри Алтынбек Рысбеков менен аталган компаниянын президенти Чжан Хэндин жолугушуусунда кол коюлду.

Ага ылайык, тараптардын өз ара аракеттенүүсүн координациялоо жана техникалык, инвестициялык долбоорлорду аныктоо үчүн биргелешкен жумушчу топ түзүлөт. Бул кызматташтык энергетикалык инфраструктураны өнүктүрүүгө жана биргелешкен долбоорлорду ишке ашырууга багытталган.

Ошондой эле жолугушууда тараптар электр энергетикасы тармагындагы кызматташтыкты, анын ичинде энергетикалык инфраструктураны модернизациялоо, электр тармактарын өнүктүрүү, санариптик технологияларды жана электр энергиясын топтоо системаларын киргизүү маселелерин талкуулашкан.