Ислам революциясынын сакчылар корпусу (ИРКС) Ормуз кысыгы жабылганын жарыялады. Кийинки буйрукка чейин кысык аркылуу бир дагы кеменин өтүшүнө уруксат берилбейт, деп билдирди ирандык Press TV телеканалы.

Ошондой эле ирандык аскерлер таануу (идентификация) системаларын өчүрүп алып, уруксат берилбеген каттам менен Ормуз кысыгы аркылуу өтүүгө аракет кылган кемеге сокку урганын билдиришти. ИРКСтин маалыматы боюнча, сокку уруунун максаты кемени токтотуу болгон.

Мындан тышкары, ИРКС Ормуз кысыгы жабылгандан кийин Иранга жаңы чабуулдар жасалса, Жакынкы Чыгыштагы душмандын аскердик базаларына сокку уруларын эскертти.

Эскерте кетсек, июнь айынын ортосунда Тегеран менен Вашингтон жаңжалды токтотууну караган меморандумга кол коюшкан. Бирок 8-июлга караган түнү АКШ сокку урууларын жандантты. АКШ президенти Дональд Трамп бул Ирандын Ормуз кысыгындагы коммерциялык кемелерге каршы аракеттерине жооп болгонун билдирип, эгерде мындай окуялар кайталана турган болсо, аскердик операцияны күчөтөрүн эскертти.

Өз кезегинде Иран АКШнын Жакынкы Чыгыштагы аскердик инфраструктуралык объектилерине сокку уруусун улантууда. Иран Ислам Республикасынын Тышкы иштер министрлиги Вашингтондун аракеттерин мурда жетишилген келишимдерди одоно бузуу деп атады.