Чолпон-Атада милиция кызматкерлери Ысык-Көлгө чөгүп каза болгон 15 жаштагы өспүрүмдүн өлүм фактысы боюнча тергөөгө чейинки текшерүү иштерин жүргүзүүдө. Бул тууралуу Reporter.kg сайтына Ысык-Көл облустук ички иштер башкармалыгынын басма сөз кызматынан билдиришти.

Маалыматка ылайык, 12-июлда нөөмөт бөлүмүнө Чолпон-Ата шаарынын аймагында көлгө адам чөгүп кеткендиги тууралуу телефон аркылуу билдирүү түшкөн. Окуя болгон жерге тергөө-ыкчам тобу барган.

Текшерүүнүн жүрүшүндө каза болгон адам 15 жаштагы өспүрүм экендиги аныкталган. Соттук-медициналык экспертиза дайындалды. Бул факт боюнча тергөөгө чейинки текшерүү иштери жүргүзүлүүдө.

Облустук ИИБ жарандарды, айрыкча ата-энелерди жашы жете элек балдарды көл жээгинде көзөмөлсүз калтырбоого чакырып, сууда коопсуздук эрежелерин сактоо адам өмүрүн сактап калуунун негизги шарты экенин эскертти.

Анара Мамытова