Ирандын Ислам революциясынын сакчылар корпусу (ИРСК) Жакынкы Чыгыш өлкөлөрүнүн тургундарын америкалык аскер кызматкерлери жайгашуусу мүмкүн болгон жерлерден алыс болууга чакырды. Бул тууралуу Anadolu агенттиги билдирет.

ИРСКнын ырастоосунда, америкалык аскерлердин бир бөлүгү аскердик базалардан чыгып, шаарларда жайгашкан имараттарга жайгашып алышкан.

Ушуга байланыштуу ирандык аскерлер тургундарга америкалык аскерлер жашыруун болушу мүмкүн болгон объектилерден кеминде 500 метр аралыкты сактоону сунушташты.

ИРСК бул эскертүү АКШнын Иран аймагына жасап жаткан соккулары жана Ирандын Куралдуу күчтөрүнүн жооп кайтаруу аракеттери менен байланыштуу экенин түшүндүрдү.

Ирандын Куралдуу күчтөрүнүн «Хатам аль-Анбия» борбордук штабынын командачысы Али Абдоллахи да каза болгон ар бир ирандык үчүн «бир америкалык аскер кызматкери өлөт» деп билдирди. Ал мындай мамиле Тегерандын жаңы аскердик стратегиясынын бир бөлүгү экенин белгиледи.

Эске салсак, 8-июлда АКШ президенти Дональд Трамп Иран менен согуштук аракеттерди токтотуу боюнча убактылуу келишим мындан ары иштебей турганын жарыялаган. Андан кийин америкалык аскерлер Ислам Республикасынын аймагына сокку урууну кайра башташкан.

АКШнын Куралдуу күчтөрүнүн Борбордук командачылыгынын (CENTCOM) маалыматы боюнча, 23-июлга карата америкалык армия катары менен 13 түн сокку урган. Командачылыктын ырастоосунда, Ирандын аскердик командалык борборлору, учкучсуз аппараттардын кампалары, байланыш тармактары жана жээктеги көзөмөл объектилери бутага алынган.

Өз кезегинде иран тарап аймактагы өлкөлөрдөгү америкалык аскердик объектилерге сокку урулганын билдирүүдө.