VI Дүйнөлүк көчмөндөр оюндарынын жалпы командалык эсебинде Казакстандын курама командасы биринчи орунду ээледи. Уюштуруу комитетинин чечими тууралуу Кыргызстандын Президентинин басма сөз катчысы Аскат Алагозов билдирди.

Акыркы таблицадагы өзгөрүү уюштуруу комитетинин командалык курамда чыккан казакстандык үч спортчунун медалдарын өз-өзүнчө эсептөө чечиминен кийин келип чыкты. Бул байгелерди өзүнчө санагандан кийин Казакстан турнирдик жадыбалдын биринчи сабына чыкты.

Алагозов Казакстандын курамасын медалдык эсептеги жеңиши менен куттуктап, көк бөрү жана жер-улак боюнча беттештер маалында эки өлкөнүн командалары менен күйөрмандарынын ортосунда эч кандай чыр-чатактын болбогондугун белгиледи.