«Кызмат» мамлекеттик мекемеси VI Дүйнөлүк көчмөндөр оюндарынын ачылыш аземине билет сатып алып, акчасы эсептен чыгарылган, бирок электрондук билет түзүлбөй калган жарандарга каражат автоматтык түрдө кайтарыларын билдирди.

Көйгөй төлөмдүн статусу тууралуу маалыматтын кечигип берилишинен улам келип чыккан. Сатып алуучулардын эсебинен акча каражаты чыгарылганы менен, система электрондук билетти өз убагында түзүп, жөнөтүүгө жетишпей калган.

Мекемеден билдиришкендей, мындай операциялардын баары кошумча текшерүүдөн өтөт. Эгер билет түзүлбөй калса, эсептен чыгарылган сумма тейлөөчү банк аркылуу сатып алуучунун картасына же банктык эсебине автоматтык түрдө кайтарылат.

Учурда маалыматтык системалардын ортосундагы өз ара аракеттенүү оптималдаштырылды. Финансылык уюмдар менен биргеликте бардык транзакцияларды автоматтык түрдө салыштыруу жүргүзүлүп, мүчүлүштүктүн кесепеттерин жоюу иштери аткарылууда.