27-августтан 2-сентябрга чейин VI Дүйнөлүк көчмөндөр оюндарынын аянтчаларында 507 адам медициналык жардам сурап кайрылды. Бул тууралуу Кыргызстандын Саламаттыкты сактоо министрлиги билдирди.

Ведомствонун маалыматы боюнча, Оюндардын катышуучуларын, конокторун, көрүүчүлөрүн жана кызматкерлерин медициналык камсыздоо иш-чаралар өтүп жаткан бардык негизги аянтчаларда уюштурулган.

Жардам көрсөтүү үчүн медициналык пункттар, мобилдик медициналык комплекстер, тез жардам бригадалары жана мобилдик госпиталь тартылган.

Кайрылган 507 адамдын көпчүлүгүнө медициналык жардам түздөн-түз ошол эле жерден көрсөтүлгөн.

Саламаттыкты сактоо министрлиги VI Дүйнөлүк көчмөндөр оюндарын медициналык камсыздоо штаттык режимде ишке ашырылып жатканын белгиледи.

Оюндардын негизги спорттук, маданий жана илимий иш-чаралары Ысык-Көлдө өтүп жатат жана 6-сентябрга чейин уланат.