Кыргыз-Орус Славян университетинде (КРСУ) Михаил Ботвинник атындагы шахмат клубу ачылды.

Клубдун алгачкы иш-чарасы гроссмейстер Сергей Карякин жана мектеп окуучулары катышкан «Чемпион менен блиц» турнири болду.

«Балдар шахмат менен машыгышы үчүн шарттарды түзүү абдан маанилүү. Бул жерде күчтүү машыктыруучулардын жана адистердин катышуусунда иш-чаралар үзгүлтүксүз өтүп, жаңы жаш таланттарды, балким, келечектеги дүйнө чемпиондорун тарбиялап чыгарууга мүмкүн болот деп үмүттөнөм. Биз биргеликте жаңы таланттардын өсүп чыгышына көмөктөшүүгө даярбыз», — деп белгиледи Карякин.

КРСУнун ректору Сергей Волков окуучуларга кайрылып, алдыга чоң максаттарды коюп, аларга жетүүсүн каалады.

«Алдыга койгон максаттарыңарга сөзсүз жетишиңерди абдан каалайм. Кыялдануудан тартынбагыла. Кыялдар орундалат!» — деди ал.

Клубдун ачылышына Улуу Пётр атындагы Санкт-Петербург политехникалык университетинин ректору Андрей Рудской да катышты. Ал 1978-жылы Михаил Ботвинник Политехникалык университетте жеке өзү шахмат клубун ачканын айтып берди. Эми бул салт КРСУда уланды.

СПбПУ жаңы клубдун иштеши үчүн университетке керектүү шаймандарды жана жабдууларды тапшырды.

Салтанат эки окуу жайдын ректорлору — Сергей Волков менен Андрей Рудскойдун ортосундагы символикалуу шахмат партиясы менен аяктады.

КРСУдан жаңы клуб окуучулар, студенттер жана башка шахмат сүйүүчүлөрү үчүн үзгүлтүксүз машыгуулардын, турнирлердин жана жолугушуулардын аянтчасына айланарын белгилешти.