Транспорт жана коммуникациялар министрлиги ушул жылдын 1-июнунан 1-сентябрына чейин жалпы салмагы 18 тоннадан ашкан жүк ташуучу унаалардын кыймылына чектөө киргизди.

Ага ылайык, абанын температурасы 28°C жана андан жогору болгон учурда саат 10:00дөн 20:00гө чейин жалпы пайдалануудагы унаа жолдорунда жүк ташуучу унаалардын жүрүүсүнө тыюу салынат. Бул чара жолдордун сакталышын камсыз кылуу максатында кабыл алынды.

Чектөө төмөнкү транспорт каражаттарына жайылтылбайт:

• жүргүнчүлөрдү ташуучу транспортко;
• гуманитардык жардам ташыган унааларга;
• тез бузулуучу тамак-аш азыктарын жана кооптуу жүктөрдү ташуучуларга;
• атайын уруксаты бар жүктөргө;
• жолдорду куруу жана оңдоо иштерине тартылган транспортко.

Көзөмөл иштерин Жерде жүрүүчү жана суу транспорту департаментинин көчмө топтору жүргүзөт. Процесс транспорттук көзөмөл пункттарында ишке ашырылат.