Күч түзүмдөрүндө иштеп, пенсияга чыккан жарандардын пенсиясы 1-октябрда көтөрүлбөйт. Бул тууралуу “Биринчи радионун” түз эфиринде Социалдык фонддун коомчулук менен иштөө башкармалыгынын башчысы Жеңишбек Мукамбетов билдирди.

Мукамбетовдун айтымында, күч түзүмдөрүндө иштеген жарандарга пенсия өзүнчө мыйзам менен берилет.

“Алардын пенсиясы республикалык бюджеттин эсебинен төлөнөт. Каржы министрлиги бизге акчаны которот, ал эми Социалдык фонд аны бөлүштүрүп коет. Биз акчаны берген ортомчубуз десе болот”, – деди ал.

Ошол эле учурда ал күч түзүмдөрүндө иштеп, пенсияга чыккандардын акчасын көтөрүү маселесин өкмөт чечерин жана ал министрлер кабинети тарабынан каралып жатканын айтты.