.svg){kind=logo}
Кыргызстан ЕАЭБден документсиз товар ташып киргендерге жазаны катаалдантты — кеңири маалымат
Кыргызстанда 21-августтан тарта Евразия экономикалык биримдигине (ЕАЭБ) мүчө өлкөлөрдүн аймагынан мамлекеттик чек ара аркылуу товарларды жана транспорт каражаттарын тиешелүү документтери жок алып өтүү үчүн жоопкерчилик күчөтүлөт. Бул тууралуу КР Мамлекеттик салык кызматынан билдиришти.
Маалыматка ылайык, өзгөртүүлөр КР Укук бузуулар жөнүндө кодексине киргизилип, административдик айып пулдардын жаңы өлчөмдөрү белгиленди.
Эгерде ташылып келе жаткан товардын баасы 500 миң сомдон аз болсо, айып пул төмөнкүдөй болот:
— жеке тараптар үчүн — 500 эсептик көрсөткүч же 50 миң сом;
— юридикалык жактар үчүн — 1 миң эсептик көрсөткүч же 100 миң сом.
Товардын баасы 500 миңден 1 миллион сомго чейин болсо, айып пулдун өлчөмү:
— жеке тараптар үчүн — 1 миң эсептик көрсөткүч же 100 миң сом;
— юридикалык жактар үчүн — 2 миң эсептик көрсөткүч же 200 миң сомду түзөт.
Эгерде товардын баасы 1 миллион сом жана андан жогору болсо, төмөнкүдөй айып пулдар каралган:
— жеке тараптар үчүн — 2 миң эсептик көрсөткүч же 200 миң сом;
— юридикалык жактар үчүн — 3 миң эсептик көрсөткүч же 300 миң сом.
Бир жыл ичинде ушундай эле тартип бузуу кайталанса, айып пулдардын өлчөмү көбөйөт. Алсак, товардын баасы 500 миң сомдон аз болгон учурда, жеке тарап 70 миң сом, ал эми юридикалык жак 130 миң сом төлөөгө мажбур болот.
Эгерде товардын баасы 500 миңден 1 миллион сомго чейин болсо, кайталанган укук бузуу үчүн жеке тараптарга 130 миң сом, ал эми юридикалык жактарга 250 миң сом айып салынат.
Товардын баасы 1 миллион сомдон ашкан учурда, айып пул жеке тараптар үчүн 250 миң сомду, ал эми юридикалык жактар үчүн 350 миң сомду түзөт. Мындан тышкары, бир жылдын ичинде укук бузуу кайталанса, укук бузуунун түздөн-түз объектиси болгон товарлар конфискацияланат.
Мамлекеттик салык кызматы салык төлөөчүлөрдү, ташуучуларды жана транспорт каражаттарынын ээлерин Кыргызстандын мамлекеттик чек арасы аркылуу товарларды жана транспортту алып өтүүдө мыйзам талаптарын сактоого чакырды.
Мекеме тиешелүү документтерди өз убагында жана туура жол-жоболоштурууга өзгөчө көңүл бурууну сунуштайт.
