Кыргызстандын президенти Садыр Жапаров менен Азербайжандын президенти Ильхам Алиев 31-июлда эки өлкөнүн ортосундагы союздаштык мамилелер жөнүндө келишимге кол коюшту. Мындан тышкары, Азербайжан президентинин мамлекеттик сапарынын алкагында тараптар дагы 14 эки тараптуу документке кол коюп, алар менен алмашышты. Бул тууралуу президенттин администрациясы билдирди.

Мамлекет башчылары ошондой эле Кыргызстан менен Азербайжандын Мамлекеттер аралык кеңешинин чечимине кол коюшту.

Кол коюлган документтердин катарында эл аралык автомобиль каттамдары жөнүндө макулдашуу, 2026–2027-жылдарга энергетика тармагындагы кызматташтык боюнча жол картасы жана эки өлкөнүн министрлер кабинеттеринин 2024–2029-жылдарга кызматташуу программасын ишке ашыруу боюнча жол картасы бар.

Тараптар ошондой эле Азербайжан-Кыргыз өнүктүрүү фондун түзүү жөнүндө макулдашууга өзгөртүүлөрдү киргизген экинчи кошумча макулдашууга кол коюшту.

Мындан сырткары, жүк ташуу, деңиз транспорту жана кеме куруу, статистика, киберкоопсуздук, мунай жана мунай продуктыларын жеткирүү, каржы рыногун жөнгө салуу, ошондой эле «Кыргызалтын» менен AzerGold компанияларынын ортосунда кызматташуу тууралуу меморандумдарга кол коюлду.

Өзүнчө меморандумдар Ош менен Гянжа, Чолпон-Ата менен Шуша, ошондой эле Каракол менен Габала шаарларынын ортосунда бир тууган шаарлык байланыштарды түзүүнү карайт.