Бишкек шаарында улуттук такси агрегаторун, электромобилдер паркын жана өлкө боюнча электр кубаттоочу станциялар тармагын түзүү боюнча үч алкактык макулдашууга кол коюлду. Келишимдер КР Экономика жана коммерция министрлигинин колдоосу менен «КР Улуттук инвестициялык фонду» ААК менен кытайлык «Shenzhen Wuyou Technology Co., Ltd.» компаниясынын ортосунда расмий түрдө бекитилди.

Кол коюу аземине инвестициялык фонддун башчысы Уран Темирбеков жана экономика министринин орун басары Беназир Нурланова катышты. Инвестициялык долбоорлор экологиялык таза электр транспортун өнүктүрүүгө, логистика тармагын санариптештирүүгө жана чет элдик капиталды тартууга багытталган.

Нурланова «жашыл» технологияларды киргизүүнүн жана Кытай Эл Республикасы менен стратегиялык өнөктөштүктү бекемдөөнүн маанилүүлүгүн баса белгиледи.