Кыргызстанда жана Орусияда “үзгүлтүксүз” (бесшовный) мобилдик операторду ишке киргизүү пландалууда. Бул кызмат биринчи кезекте Орусияда иштеп жаткан кыргызстандыктар арасында чоң суроо-талапка ээ болот. Бул тууралуу Орус-Кыргыз өнүктүрүү фондунун (ОКӨФ) башкармалыгынын төрагасы Артем Новиков билдирди.

Анын айтымында, долбоорду «Beeline Кыргызстан» жана «Билайн Орусия» компаниялары ОКӨФтүн каржылык колдоосу менен ишке ашырышат. Долбоордун алкагында эки оператордун мобилдик байланыш кызматтары, акча которуулары жана санариптик сервистери бириктирилет.

Абоненттер Кыргызстан менен Орусиянын ортосунда ары-бери жүргөндө SIM-картасын алмаштырууга муктаж болбойт деп болжолдонууда. Бул эки өлкөдө тең көнүмүш байланыш кызматтарынан жана санариптик сервистерден тоскоолдуксуз пайдаланууга мүмкүндүк берет.

Новиковдун айтымында, келечекте ушуга окшош долбоорду Өзбекстан жана Тажикстанда да ишке ашыруу пландалууда.