2026-жылдын 23-августуна карата республика боюнча 438,9 миң гектар аянттан дан өсүмдүктөрү (буурчак өсүмдүктөрүн, күрүчтү жана гречканы кошпогондо) жыйналды — бул өткөн жылдын ушул күнүнө салыштырмалуу 2,4%га көп. Ошол эле учурда алгачкы кабыл алынган салмакта 1,3 млн тоннадан ашык дан бастырылды, бул былтыркы көрсөткүчтөн дээрлик 50%га көп.

Дан өсүмдүктөрүнүн орточо түшүмдүүлүгү бир жыл мурунку 21,2 центнерге салыштырмалуу гектарына 30,8 центнерди түздү. Буудай 654,7 миң тонна бастырылып (түшүмдүүлүк 30,5 ц/га) — былтыркыдан 54,6%га көп болду. Арпа 544,9 миң тонна жыйналды (түшүмдүүлүк 26,9 ц/га) — өсүш 55,7%ды түздү. Дан үчүн эгилген жүгөрү 147,9 миң тонна бастырылып, өткөн жылдагы көрсөткүчтөн 12,4%га ашты.

Буурчак өсүмдүктөрү 3,9 миң тонна (өсүш 2,9%), май алынуучу өсүмдүктөр — 6,9 миң тонна (өсүш 14,5%, бирок гектарынан түшүмдүүлүк 7,8%га төмөндөгөн) жыйналды.

Картошка 21,2 миң гектар аянттан казылып, жалпы 359,9 миң тонна алынды — түшүмдүүлүк 171,8 ц/га түзүп, бир жыл мурункуга караганда 8,5%га көп болду. Жашылча 714,5 миң тонна (өсүш 0,5%), бакча өсүмдүктөрү — 263,1 миң тонна (төмөндөө 0,6%), мөмө-жемиштер — 149 миң тонна (өсүш 5,3%) жыйналды.

Улуттук статистика комитетинен белгилешкендей, вегетация мезгилиндеги жагымдуу аба ырайы арпанын, буудайдын, дан жүгөрүнүн, картошканын, мөмө-жемиштердин жана жашылчалардын дүң жыйымынын өсүшүнө өбөлгө түздү.