Кыргызстандын Юстиция министрлиги Укуктук маалыматтардын борборлоштурулган банкына (ЦБД) жайгаштырылган Конституциянын кыргыз жана орус тилдериндеги тексттери кагаз түрүндөгү түп нускаларына дал келерин билдирди. Мекеме ушундайча Жогорку Кеңештин депутаты Дастан Бекешевдин жасалма интеллекттин жардамы менен Баш мыйзамдын орусча котормосунан 44 ката тапканы тууралуу билдирүүсүнө жооп берди.

Министрлик сөз 2021-жылдын 11-апрелиндеги референдумда кабыл алынган Конституция жөнүндө болуп жатканын белгиледи. Мекеменин маалыматына ылайык, анын мамлекеттик жана расмий тилдердеги электрондук тексттери түп нускаларына дал келет.

Ошол эле учурда министрлик жасалма интеллект ченемдик укуктук актылардагы каталарды расмий түрдө ырастай турган инструмент болуп саналбай турганын баса белгиледи.

Мекеме депутат буга чейин сынга алган мыйзамдардын электрондук базасынын иши боюнча да түшүндүрмө берди.

Юстиция министрлигинин маалыматына ылайык, ЦБД күнү-түнү иштеген, бардык жарандар үчүн акысыз жеткиликтүү укуктук маалымат булагы болуп саналат. Учурда анда 140 миңден ашык ченемдик укуктук акт жайгаштырылган. Алардын катарында Конституция, мыйзамдар, кодекстер, президенттин жарлыктары, Жогорку Кеңештин жана министрлер кабинетинин токтомдору бар. Базада колдонуудагы документтер менен катар күчүн жоготкон актылар да камтылган.

Министрлик документтердин олуттуу бөлүгү кагаз түрүндөгү нускалардан электрондук форматка өткөрүлгөнүн түшүндүрдү. Мекеменин маалыматына караганда, маалымат базасын өркүндөтүү жана процесстерди автоматташтыруу боюнча иштер туруктуу жүргүзүлүүдө.

Мындан тышкары, учурда MYIZAM.KG жаңы платформасы пилоттук режимде сыноодон өтүүдө. Ал жарандар үчүн мыйзамдарды издөөнү жана пайдаланууну жеңилдетүүгө багытталган.

Юстиция министрлиги маалыматтык системаларды жакшыртуу боюнча конструктивдүү сунуштарды кароого даяр экенин билдирди.

Эске салсак, буга чейин Жогорку Кеңештин депутаты Дастан Бекешев ChatGPT’нин Codex тиркемеси аркылуу Юстиция министрлигинин базасында жайгаштырылган Конституциянын кыргызча жана орусча тексттерин салыштырып, 44 болжолдуу ката тапканын билдирген.

Парламентарийдин айтымында, алардын 14ү жоболордун маанисине байланыштуу, 17си котормону ар кандай чечмелөөгө жол берет, дагы 13ү тексттин стилистикасына жана сабаттуулугуна тиешелүү. Бекешев текшерүүнүн жыйынтыктарын өзү да карап чыкканын жана аныкталган так эместиктер олуттуу болбосо да, чындап бар деп эсептей турганын белгилеген.

Ошол эле учурда депутат «Эркин Тоо» гезитинде жарыяланган түп нускаларды эмес, документтердин электрондук версияларын колдонгонун тактаган. Ошондуктан текшерүүнүн жыйынтыктарын баштапкы булак менен кошумча салыштыруу зарыл экенин айткан.

Бекешев ошондой эле Юстиция министрлигинин маалымат базасынын сапатын сынга алып, анда айрым сүйлөмдөр түшүп калганын, документтердин даталары жана номерлери туура эмес көрсөтүлгөнүн, ал эми күчүн жоготкон айрым актылар дагы деле колдонуудагы документ катары белгиленип турганын билдирген. Анын пикиринде, мындай так эместиктерден улам юристтер акы төлөнүүчү укуктук маалымат базаларын пайдаланууга аргасыз болууда.