Кыргызстанда аймактык ишкердикти өнүктүрүү үчүн жеңилдетилген насыялоо долбоору ишке кирди. Бизнес жана стартаптар 10 жылга чейинки мөөнөткө жылдык 2% менен 20 миллион сомго чейин насыя ала алышат.

«Мамлекеттик каржы холдинги» ААКсы Каржы министрлигинин катышуусунда бюджеттик насыялоонун эсебинен ишкерлерди мамлекеттик колдоону караган «Кыргыз Республикасынын аймактарын экономикалык өнүктүрүү» долбоорун ишке киргизди.

Долбоор аймактардын экономикасын өнүктүрүүгө, инвестициялык активдүүлүктү жогорулатууга, жаңы жумуш орундарын түзүүгө жана бизнестин жеңилдетилген каржылоого жеткиликтүүлүгүн кеңейтүүгө багытталган.

Каржылоону жеке ишкерлер, юридикалык жактар жана стартап-долбоорлордун авторлору ала алышат. Каражаттарды туризм, жеңил өнөр жай, өндүрүш, саламаттыкты сактоо, билим берүү, энергетика жана айыл чарба продукциясын кайра иштетүү чөйрөлөрүндөгү долбоорлорду ишке ашырууга жумшоого болот.

Насыялар жеңилдетилген шарттарда берилет: пайыздык чен жылдык 2%ды түзөт, максималдуу сумма — 20 миллион сомго чейин, насыялоо мөөнөтү — 10 жылга чейин, мында негизги карызды төлөө боюнча 12 айга чейинки жеңилдетилген мезгил каралган.

Уюштуруучулар белгилегендей, долбоорду ишке ашыруу аймактарда ишкердикти өнүктүрүүгө, өндүрүштү модернизациялоого, инвестиция тартууга жана өлкөнүн экономикалык дараметин чыңдоого өбөлгө түзүшү керек.