Кыргызстандын Президентинин администрациясы коомдук тамактануу жайларын пландан тышкары текшерүүнү караган мыйзам долбоорун коомдук талкууга чыгарды.

Документтин маалымкат-негиздемесинде белгиленгендей, социалдык тармактарда коомдук тамактануу жайларындагы санитардык-эпидемиологиялык талаптардын бузулушу тууралуу маалыматтар тез-тез жарыяланып турат. Бирок ыйгарым укуктуу органдар мындай билдирүүлөргө ыкчам чара көрө алышпайт, анткени колдонуудагы мыйзамдар пландан тышкары текшерүүлөрдү жүргүзүүгө чек коёт.

Мыйзам долбоорун иштеп чыгуучулардын маалыматына караганда, Экономика жана коммерция министрлиги көзөмөл иш-чараларын жүргүзүүгө уруксат бербейт, себеби бул колдонуудагы нормаларга карама-каршы келет.

Президенттин администрациясы баса белгилегендей, азыркы учурда санитардык-эпидемиологиялык кызмат жарандардын ден соолугуна коркунуч жаралгандан же зыян келтирилгенден кийин гана кийлигише алат. Ошол эле учурда, бул кызматтын негизги милдети — мындай окуялардын алдын алуу болуп саналат.

Буга байланыштуу коомдук тамактануу жайлары үчүн өзгөчөлүк киргизүү жана санитардык-эпидемиологиялык органдарга мындай жайларды пландан тышкары текшерүү укугун берүү сунушталууда.