Кыргызстанда картошканы чет жакка экспорттоого убактылуу тыюу салуу пландалууда. Бул тууралуу Суу ресурстары, айыл чарба жана кайра иштетүү өнөр жай министрлиги билдирди.
Мындай демилге азык-түлүк коопсуздугун камсыз кылуу, социалдык мааниге ээ азык-түлүктөргө болгон баалардын негизсиз жогорулашын алдын алуу жана бааларды туруктуу кармоо максатында көтөрүлүүдө.
Министрликтен белгилешкендей, 1-февралда өкмөт башчынын орун басары, министр Бакыт Төрөбаев өлкөдөгү азык-түлүктүн баасына байланыштуу кеңешме өткөргөн. Анда ал Экономика жана коммерция министрлигине, Монополияга каршы жөнгө салуу кызматына, президенттин облустардагы ыйгарым укуктуу өкүлчүлүктөрүнө, жергиликтүү бийлик органдарына азык-түлүктүн баасын тыкыр көзөмөлгө алууну тапшырган.
