Кыргызстанда 2027–2029-жылдары керектөө баалары жалпысынан болжол менен 21,7% өсүшү мүмкүн. Бул көрсөткүч 2027-жылга жана 2028–2029-жылдардын пландык мезгилине республикалык бюджеттин долбоорунда келтирилген инфляция боюнча болжолдордун негизинде эсептелди.

Документке ылайык, 2027-жылы инфляция 7,5%, 2028-жылы 6,6%, ал эми 2029-жылы 6,2% деңгээлинде болушу күтүлүүдө.

Ошентип, өкмөт баалардын өсүү темпи акырындык менен басаңдайт деп болжолдоодо. Бирок бул товарлар менен кызмат көрсөтүүлөр арзандайт дегенди билдирбейт. Баалар мындан ары да өсөт, болгону алардын кымбаттоо темпи жыл сайын төмөндөйт.

Мисалы, 2026-жылдын аягында товарлардын шарттуу топтому 1 000 сом турса, болжолдор ишке ашкан учурда 2027-жылдын аягында анын баасы 1 075 сомго, 2028-жылдын аягында болжол менен 1 146 сомго, ал эми 2029-жылдын аягында 1 217 сомго жетет.

Бюджеттин долбоорунда инфляцияны ооздуктоо үчүн акча-кредит жана бюджет-салык саясатын өз ара шайкеш жүргүзүү пландалып жатканы белгиленген.

Ошол эле учурда Улуттук банк инфляцияны 5–7% максаттуу чегинде кармоого багытталган саясатты жүргүзөт.

Документке ылайык, баалардын өзгөрүшүнө ички факторлор, анын ичинде керектөөчүлөрдүн суроо-талабы жана өндүрүш чыгымдары, ошондой эле тышкы экономикалык шарттар таасир этет.