Кыргызстандын Түштүк-Батыш оперативдик колбашчылыгынын 35524 аскер бөлүгүнүн аскер кызматчылары «Эфес-2026» эл аралык аскердик машыгуусуна катышып жатышат. Коргоо министрлигинин маалыматында, машыгуулар Түркиянын Измир шаарындагы «Картал» полигонунда өтүп жатат.

20-апрелден 21-майга чейин созулган бул машыгууга жалпысынан 17 мамлекеттин аскерлери катышууда. Иш-чаранын алкагында согуш аракеттерин жүргүзүү ыкмалары жана жаңы технологияларды колдонуу боюнча 28 окуу жайы уюштурулган.

Учурда машыгуунун сценарийине ылайык, активдүү фазага даярдык көрүлүүдө. Иш-чара тажрыйба алмашуу жана аскердик кызматташтыкты чыңдоо максатын көздөйт.