Кыргызстандын Майлуу-Суу шаарындагы №54 мектептин 8-классынын окуучусу Мээрим Турдумахаматова «Росатом» мамлекеттик корпорациясынын «Билимдин муз жаргычы» эл аралык илимий-агартуучулук экспедициясына катышып, Түндүк уюлга барып келди. 13-августта экспедиция Түндүк уюлдан Мурманск шаарына кайтып келди.

Мээрим Турдумахаматова бул долбоорго Кыргызстанда катталган 827 талапкердин ичинен тандалып алынган жалгыз окуучу болду. Ал «Атом технологиялары бүгүн дүйнөнү кантип өзгөртүүдө» деген темадагы долбоорун коргоп, үч этаптуу тандоодон өткөн. Жалпысынан бул тандоого 22 өлкөдөн 5 миңге жакын өспүрүм катышкан.

Экспедиция «Жеңишке 50 жыл» атомдук муз жаргычынын бортунда өттү. Сапар 10 күнгө созулуп, Мурманск — Түндүк уюл — Франц-Иосиф жери — Мурманск маршруту боюнча ишке ашырылган. Бул сапар Түндүк уюлга жер үстүндөгү кеме менен жасалган 200-экспедиция катары катталды.

Программанын алкагында катышуучулар окумуштуулар менен биргеликте радиозондду учуруу жана стратосфералык платформаны сыноо боюнча эксперименттерди аткарышкан. Ошондой эле жазуучу Сергей Лукьяненко менен биргеликте илимий-фантастикалык аңгеме жазып чыгышкан.

Мээрим Турдумахаматова Арктикадагы сапар учурунда ак аюуларды көргөнүн жана Түндүк уюлда Кыргызстандын туусун көтөргөнүн билдирди. Окуучу өз билдирүүсүндө келечектеги кесибин атомдук энергетика тармагы менен байланыштырууну пландап жатканын айтты.

«Билимдин муз жаргычы» долбоору табигый-илимий багыттарды жана атомдук технологияларды жайылтуу максатында «Росатом» тарабынан уюштурулуп келет. Жети сезондун ичинде бул экспедицияга дүйнөнүн ар кайсы өлкөлөрүнөн 470тен ашык окуучу катышкан.