Кыргызстандык дизайнер жана ишкер, BAIRA мода үйүнүн жана этнобрендинин негиздөөчүсү, ошондой эле башкы директору 2026-жылы өтө турган VI Дүйнөлүк көчмөндөр оюндарына карата Кыргызстандын курама командасынын параддык формасын тааныштырды.

Посмотреть эту публикацию в Instagram

Публикация от Reporter.kg (@reporter_kg)

Форманын сүрөттөрүн дизайнер социалдык тармактардагы баракчасына жарыялады. Анын айтымында, концепциянын негизин улуттук мурас жана муундар байланышы түздү.

«Ар бир сызык терең мааниге ээ: ал муундардын элесин сактап, улуттук мурастын жаңырыгын чагылдырат жана Саманчынын жолу сыяктуу келечекке умтулат», — деп айтылат билдирүүдө.

Дизайнда Дүйнөлүк көчмөндөр оюндарынын айдентикасынан алынган көк, кочкул кызыл (бордо) жана сары түстөр колдонулган. Параддын катышуучулары түстөр боюнча бөлүштүрүлдү: спортчулар кочкул кызыл, уюштуруу комитетинин өкүлдөрү көк, ал эми машыктыруучулар күрөң түстөгү форма кийишет.

Бул образды ак түстөгү улуттук баш кийимдер толуктайт. Авторлордун идеясы боюнча, ал ар-намысты жана ой-тилектердин тазалыгын туюнтат.

VI Дүйнөлүк көчмөндөр оюндары Кыргызстанда 2026-жылдын 31-августунан 6-сентябрына чейин өтөт.

Reporter.kg — ДКОнун маалыматтык өнөктөшү.