Журналист Махабат Тажибек кызы актёр Жорж Клуни жана анын жубайы Амаль Клуни тарабынан негизделген Albies сыйлыгына көрсөтүлдү. Бул тууралуу укук коргоочу Гүлшайыр Абдирасулова билдирди.

Сыйлык тапшыруу аземи үстүбүздөгү жылдын 7-октябрында Лондон шаарында өтөт.

Ошол эле учурда, 25-августта Бишкек шаарынын Ленин райондук сотунда Махабат Тажибек кызына карата козголгон кылмыш ишин кайра кароо башталат.

Укук коргоочунун айтымында, 25-августтагы соттук отурумда Махабат Тажибек кызынын сыйлык алуу үчүн Лондонго баруусуна уруксат берүү маселеси да каралат.

Эске салсак, Махабат Тажибек кызы 2024-жылдын 16-январында камакка алынган. Анда ага Кылмыш-жаза кодексинин 278-беренеси (массалык башаламандыктарга чакырыктар) жана 327-беренеси (бийликти басып алууга чакырыктар) боюнча айып тагылган. 2024-жылдын 10-октябрында Бишкектин Ленин райондук соту аны күнөөлүү деп таап, алты жылга эркинен ажыраткан.

Кийин 2026-жылдын 10-мартында Жогорку сот Махабат Тажибек кызына карата козголгон кылмыш иши боюнча буга чейин чыгарылган бардык соттук чечимдерди жокко чыгарып, ишти биринчи инстанциядагы сотко жаңыдан кароо үчүн жөнөткөн. Ал эми 23-мартта, Бишкектин Ленин райондук соту журналисттин баш коргоо чарасын өзгөртүп, эч жакка кетпөө жөнүндө тил каттын негизинде эркиндикке чыгарган.

Маалымат үчүн: The Albies сыйлыгы — 2022-жылы жубайлар Жорж жана Амаль Клунинин Clooney Foundation for Justice фонду тарабынан негизделген жыл сайын берилүүчү эл аралык сыйлык.