Кыргызстандын Саламаттык сактоо министрлигине караштуу Республикалык патологиялык анатомия бюросу (РПАБ) жана Улуттук онкология жана гематология борбору (УОГБ) үчүн жалпы баасы 750 миң сомду түзгөн төрт заманбап микроскоп сатылып алынды. Бул тууралуу Саламаттык сактоо министрлигинин басма сөз кызматы билдирди.

Жабдууларды сатып алууга каражат КР Президентинин фондунан бөлүнгөндүгү такталды.

Басма сөз кызматынын маалыматы боюнча, үч микроскоп РПАБга, дагы бири онкологиялык ооруларга морфологиялык диагностика жүргүзүлүүчү УОГБнын лабораториясына берилди.

«Жаңы жабдуулар изилдөөлөрдүн сапатын кыйла жогорулатууга жана кызматтын мүмкүнчүлүктөрүн кеңейтүүгө мүмкүндүк берет. Кызматты колдогону үчүн КР Президенти Садыр Нургожоевич Жапаровго чын жүрөктөн ыраазычылык билдиребиз. Патологоанатом үчүн микроскоп негизги иш куралы болуп саналат. Диагностиканын тактыгы анын сапатынан түздөн-түз көз каранды. Оптика канчалык жакшы болсо, адис изилденип жаткан материалды ошончолук даана көрөт жана диагнозду ишенимдүү коё алат», — деп белгиледи РПАБдын директору Валентина Пахман.

Ал бюронун адистери жыл сайын Бишкектин медициналык мекемелеринен келген 45 миңге чейинки биопсиялык жана операциялык материалдарды изилдешерин баса белгиледи. Бул изилдөөлөрдүн жыйынтыгы диагноз коюуда жана бейтаптарды дарылоонун кийинки тактикасын тандоодо маанилүү роль ойнойт.

Пахман белгилегендей, жаңы жабдуулардын өзгөчө баалуулугу анын санариптик функциясында — жогорку сапаттагы оптикадан тышкары, микроскоптор компьютерге туташтыруу мүмкүнчүлүгү бар заманбап фото жана видеокамералар менен жабдылган.

«Бул биз үчүн чоң кадам. Эми биз микроскоп аркылуу изилдөө жүргүзүү менен чектелбестен, сүрөттү мониторго чыгарып, аны клиникалык-анатомиялык конференциялар учурунда көрсөтө алабыз, билим берүү процессинде колдонуп, башка аймактардын жана өлкөлөрдүн адистери менен аралыктан консультацияларды өткөрө алабыз. Мындан тышкары, сейрек кездешүүчү жана татаал клиникалык учурлардын санариптик архивин түзүү мүмкүнчүлүгү пайда болду», — деди РПАБдын башчысы.

Валентина Пахмандын айтымында, мындай технологияларды киргизүү телемедицинаны өнүктүрүүгө жана медициналык уюмдардын ортосундагы кесиптик өз ара аракеттенүүнүн сапатын жогорулатууга жаңы мүмкүнчүлүктөрдү ачат.

Ал жаңы жабдуулардын адистер үчүн маанилүүлүгүн өзүнчө белгиледи.

«Биздин дарыгерлер күн сайын микроскоптун алдында көптөгөн сааттарды өткөрүшөт. Кээде дээрлик бүт иш күнү препараттарды изилдөө менен өтөт. Ошондуктан микроскоптун сапаты диагностиканын тактыгына гана эмес, иштин ыңгайлуулугуна, ошондой эле кызматкерлердин көрүү жөндөмүн сактоого да таасирин тийгизет», — деп баса белгиледи ал.

РПАБ мекеменин иши биринчи кезекте тирүү бейтаптарга жардам берүүгө багытталганын белгиледи — дал ушул жерде биопсиялык жана операциялык материалдарды изилдөө жүргүзүлөт, бул дарыгерлерге диагноздорду өз убагында коюуга жана дарылоонун кийинки тактикасын аныктоого мүмкүндүк берет.

Берилген микроскоптор орнотулуп, РПАБ жана УОГБ адистери тарабынан күнүмдүк иште колдонулуп жатат.

Адистердин айтымында, жаңы жабдуулар колдонууга берилген алгачкы күндөрдөн баштап эле суроо-талапка ээ болду жана Кыргызстандын калкына медициналык жардам көрсөтүүнүн сапатын мындан ары жогорулатуу үчүн маанилүү курал болуп калат.