Кыргызстандын Борбордук шайлоо комиссиясы (КР БШК) президенттик шайлоону даярдоого жана өткөрүүгө каралган чыгымдардын сметасын 1,2 млрд сом өлчөмүндө түздү.

Бул сумманын 646,56 млн сому 2026-жылга, ал эми дагы 553,44 млн сому 2027-жылга каралган.

Жалпы суммага, эгер зарыл болсо, кайра добуш берүүнү өткөрүү үчүн 240 миллион сом жана чет өлкөдө жүргөн кыргызстандыктардын добуш берүүсүн уюштурууга 53,2 миллион сом киргизилген.

Смета 2 миң 653 участоктык шайлоо комиссиясынын (УШК), анын ичинде чет өлкөлөрдөгү 100 шайлоо участкасынын ишин камсыз кылууга эсептелген. Мындан тышкары, аралыктан добуш берүү боюнча кошумча 40 участок уюштуруу пландалууда.

Шайлоого УШКнын 26 миң 819 мүчөсү, анын ичинде автоматтык эсептөөчү түзүлүштөрдүн (АСУ) 5 миң 66 оператору жана идентификациялоо боюнча дагы ошончо оператор тартылат. Аймактык шайлоо комиссияларынын (АШК) курамына 674 адам кирет.

Мындан сырткары, тартылган 1 миң 609 операторго, техникалык колдоо топторунун 600 адисине жана башка кызматкерлерге акы төлөп берүү каралган. Ал эми УШК мүчөлөрү шайлоону даярдоо жана өткөрүү мезгилинде айына 3 миңден 8 миң сомго чейин алышат.

Чыгымдардын катарына ошондой эле шайлоо процессинин катышуучуларын окутуу, байланыш менен камсыздоо, маалыматтык материалдарды даярдоо жана басып чыгаруу, жабдууларды жана зарыл товарларды сатып алуу, жабдууларды аймактарга жеткирүү жана кайра кайтарып алуу, ошондой эле шайлоо документтери менен материалдарын ташуу да кирет.

Майыптыгы бар жарандардын шайлоо укуктарын камсыз кылуу боюнча иш-чараларды, чет өлкөлөрдөгү участкалардын ишин жана эл аралык делегациялардын катышуусундагы расмий иш-чараларды каржылоо өзүнчө каралган.

Жалпысынан смета 56 аймактык жана 2 миң 653 участоктык шайлоо комиссиясынын ишмердүүлүгүн камсыздоону карайт.